Domingo, 30 de Setembro de 2007
Las purmeiras augas

L més d'Outubre amostra las oureilhas i chégan las purmeiras augas. Agora que las bendimas yá ban meio acabadas, estas augas son bien-benidas. Nós i la tierra, nós, tierra, precisamos d'eilhas cumo de pan pa la boca. Ou seia para bibir.

Assi i todo ye mui curjidoso cumo todos ls dies oubimos que, quando chuobe, bai a star malo tiempo, indas que steiamos an ne meio d'ua seca strema, cumo agora se diç. Malo tiempo porquei? Nun precisamos d'auga? Seriemos capazes de bibir nun mundo donde solo oubisse centros comerciales cobiertos, buracos de metro donde l'auga nun antrasse, stradas i caminos cerrados?  Quereriemos bibir nesse mundo? anton porquei l'auga que ye funte de bida ye malo tiempo?

Abençoado seia este tiempo que mos trai i bida.



Scrito por António Bárbolo Alves às 22:39
Link de l post | Comentar | Acrecentar als faboritos
|

Sábado, 22 de Setembro de 2007
Çcurso, metodologie i tecnologie

Para quien, por acauso, nun conheça ou nun beia la página de l Centro de Studos António Maria Mourinho - www.ceamm.no.sapo.pt - queda la lhembráncia de que nos dies 5 i 6 d'Outubre teneremos, an Miranda, un Ancontro Anternacional subre l Çcurso, la metologie i la tecnologies.

De l Programa, que puode ser bisto eiqui -  http://ceamm.no.sapo.pt/Programa_Encontro.pdf - ancuntramos ambestigadores pertueses, brasileiros, franceses, romenos, alemanes (spero nun çquecer a naide!) que staran an Miranda a falar i çcutir subre estas cousas.

Ye mais ua mano para que la nuossa tierra faga parte de l mapa de ls Ancontros Científicos i daquilho que se fai i se studa por esse mundo fuora.

Acá bos asperamos.



Scrito por António Bárbolo Alves às 00:00
Link de l post | Comentar | Ber comentairos (1) | Acrecentar als faboritos
|

Sexta-feira, 14 de Setembro de 2007
Sermon de Santo Antonho
Ye berdade qu’an pertués sona bien. Mas an mirandés tamien. I porque staba eiqui a (re)le-lo, nun rejisto a traduzir, nua traduçon libre i un pouco a la priessa, alguas palabras deste Sermon de Santo Antonho, de l nuoso António Vieira:
 
“Nacer pequeinho i morrer grande, ye chegar a ser home. Por isso mos dou Dius tan pouca tierra pa l nacimiento, i tantas pa la sepultura. Para nacer, pouca tierra; para morrer toda la tierra: para nacer, Pertual: para morrer, l mundo. Parguntai a buossos abós quantos salírun i quan poucos tornórun. Mas estes son ls uossos de que mais se debe honrar la buossa sangre.”


Scrito por António Bárbolo Alves às 00:38
Link de l post | Comentar | Ber comentairos (1) | Acrecentar als faboritos
|

Quarta-feira, 12 de Setembro de 2007
Por un plano de leitura, an mirandés

Por estes dies ampecará la scola. Astanho, cumo yá por eiqui screbi, l mirandés tenerá trés professores a ansinar mirandés. Cousa buona, sien dúbida, imbora l mirandés nun precise solo de ser ansinado als mais nuobos. Mas isso ye asusnto para outro die!... 

L assunto d'hoije  ye la leitura. Nua sociedade oural, cumo la mirandesa, isto até puode parecer que nun fai muito sentido. Mas nun ye assi. Por un lhado, quando falo an "leitura" stou a pensar an todos ls testos seian eilhes transmitidos por bia oural ou scrita. Uns i outros precísan de ser conhecidos, lidos i antendidos. Por outro lhado, nos nuossos dies, imbora l ouralidade, la palabra, tenga un papel amportante, ye la scrita que manda i contra isso nada podemos fazer.

Ora, ls testos, seian eilhes quales fúren i béngan eilhes donde béngan, solo ténen sentido ou ténen un sentido diferente, quando cumparados cun outros. Un testo solo, un libro solo, pouco bale. Ye precisa ua pequeinha biblioteca para que las cousas ampécen a tener mai(s) sentido(s).

La cultura mirandesa ten ls sous alheçanes nos testos ourales. Mas hoije an die yá ampeçamos a tener tamien ua pequeinha biblioteca de testos scritos. Ye preciso conhecer (ler) esses testos pois neilhes stan, cumo dixe, muitos de ls nuossos alheçanes eidentitários. Para isso, precisamos tamien d'un plano de leitura de ls testos mirandeses, que mos ansine a ler, que mos ansine a antender i a çcubrir aquilho que somos, para melhor sabermos para donde queremos ir. S'assi nun fur, als poucos, quedaremos ua sociedade de tartamudos, cun muitos problemas para comunicar porque la nuossa lhenguaige stará lhimitada a  alguas palabras que nun seran capazes de dezir aquilho que queremos i sentimos.

Nun ye solo la scola que ten esse papel. Las Bibliotecas, las Associaçones Culturales, las Famílias, ls Lares i Centros de Die, todos tenemos la respunsabilidade d'ansinar i de daprender.  Propongo, por isso, qu'astanho (2007/2008) sei l anho de la leitura an mirandés. Eiqui queda l zafio para quien querga ajuntar-se a  nós neste camino.



Scrito por António Bárbolo Alves às 11:11
Link de l post | Comentar | Ber comentairos (1) | Acrecentar als faboritos
|

Domingo, 9 de Setembro de 2007
La rentrée

L Naso.

La rentrée política de la Tierra de Miranda fai-se no Naso. No die 8 de Setembro -- ou no die siete, a la nuite -- alhá stá todo l mundo: ls que mándan, ls que quieren mandar, ls qu'ándan atrás de quien manda, ls qu'ándan atrás de quien puode benir a mandar... todos.  Ye ua berdadeira romarie feita cun la deboçon de las grandes causas, an nome de promessas que cada un fizo al santo de la sue deboçon i que, cumo siempre, naide mais conhece. I este ye l problema. Ua berdadeira rentrée habie de meter tamien çcursos, çcussones, eideias nuobas i bielhas. La rentrée de l Naso nun ten nada disso. Bruído, solo l que ye feito pu las orquestras cun cantadeiras que fázen abrir las oureilhas i subretodo ls uolhos. Eideias i çcussones solo las de l sermon de l die 8, feito pul cura, quaije siempre eigual al de l anho passado, mas que pouco amporta porque yá todos mos çquecimos.

I ye pena. Giente que nun çcute, que nun fala, solo se mira, nun puode lhebar al nacimiento de grandes feitos mas solo aqueilhes que, na barriga de cada un, son melhores do que ls outros até porque nun conhece mais ningun. Bálga-mos Nuossa Senhora de l Naso que, a ser berdade qu'este "naso" ben mesmo de la nariç lhatina, nun le debe cheirar mui bien esta rentrée que nunca passa de l sagrado. Sálba-mos, por cierto, las buonas postas de chicha qu'alhá se cómen.  Sic transit gloria mirandae...



Scrito por António Bárbolo Alves às 14:06
Link de l post | Comentar | Ber comentairos (2) | Acrecentar als faboritos
|

Segunda-feira, 3 de Setembro de 2007
La(s) raia(s) de l mirandés

Sabemos que la lhéngua a qu'hoije chamamos mirandés se falou, no spácio que ye hoije pertués,  nua área muito mais lharga do qu'aqueilha donde hoije ye falada. Mas nun sabemos an que stado s'ancóntran essas marcas, porque nun hai studos científicos subre eilhas. I bien preciso era conhecer essas marcas i sinales. Antre muitas rezones stá la de sermos capazes d'aprobeitar aquilho que para muitos son "erros" de pertués, para splicarmos porquei se diç assi ou porquei essa palabra ten este ou aquel sentido...

Dues de las tierras assinaladas cumo habendo feito parte parte desse spácio lhenguístico son RIO DE OUNOR i GUADRAMIL. Ls studos subre l falar destas aldés son tamien bastante antigos i, que you saba, nun ls hai mais recientes. Deixo eiqui dues referéncias, que puoden ser un ampercípio, para quien se querga dedicar als falares destas dues tierras:

RODRIGUES, José Daniel (antigo reitor do Liceu de Bragança), O riodonorense. Lendas. Folclore. Bragança, Edição da Junta Distrital, 1973.

"O falar de Guadramil", in Amigos de Bragança, 3ª série, 1966/1967, nºs 4 (121-136); 5 (47-59); 6(39-56); 7 (29-45); 8 (79-95); 9 (32-48); 10 (33-52). 



Scrito por António Bárbolo Alves às 12:22
Link de l post | Comentar | Ber comentairos (2) | Acrecentar als faboritos
|


Saber neste blog
 
Dezembro 2007
Dom
Seg
Ter
Qua
Qui
Sex
Sab

1

2
3
4
5
6
7
8

9
10
11
13
14
15

17
18
19
20
21
22

23
24
25
26
27
28
29

30
31


Últimos posts

Outro blogue

L sabor de las palabras

L cura i la criada

L nino Jasus de la Cartol...

L problema de las lhéngua...

L sermon (ua cunta)

Alguas nomeadas

Quadras populares

Folhetos

L populismo i l pobo

Arquibos

Dezembro 2007

Novembro 2007

Outubro 2007

Setembro 2007

Agosto 2007

Julho 2007

Junho 2007

Maio 2007

Abril 2007

Março 2007

Fevereiro 2007

Fazer olhinhos
blogs SAPO
subscrever feeds