Sexta-feira, 4 de Maio de 2007
Sabedorie subre la coluobras

La diferência antre l Bien i l Mal, pessonalizados an Dius i no Diabo, ye antiquíssima. Ancuntramos-la  yá no mundo ouriental y persa antes de l cristianismo. L Diabo ye Ahriman, la grande serpiente de la nuite, einemiga d’Ormuz.

L cristianismo hardou l mito de l Diabo i del salírun outros seres diabólicos, cumo la bruxa, la serpiente y outros animales fantásticos. Assi se fui stendendo l miedo de la coluobras na cultura popular. La tradiçon oural mirandesa stá chena destas marcas de l miedo lharbar als oufídios, subretodo a las coluobras, nua relaçon direta cun la tradiçon bíblica.

Eiqui ban a quedar alguas cousas, ditos i cuntas, subre las coluobras, que se puoden oubir na Tierra de Miranda. Ampeço hoije por ua pequeinha cunta qu'oubi an Bila Chana:

 

Ua beç ua rapaza staba a drumir i antrou-le ua coluobra pu la boca. Apuis l rapaç que la namoraba biu, mas nun dixo nada. Anton la barriga de la rapaza ampeçou a crecer. Ampeçou a crecer ls pais çcunfiórun. Çcunfiórun anton l rapaç ye que le çcubriu qu’habie sido la coluobra. Apuis diç que la punírun a la borda d’un caldeiro de lheite, cun la boca abierta i que la coluobra saliu.



Scrito por António Bárbolo Alves às 23:59
Link de l post | Comentar | Acrecentar als faboritos
|

Quinta-feira, 3 de Maio de 2007
Fráncia, Pertual i la lei de l tabaco

An Fráncia ye hoije l debate antre Nicolas Sarkozy i Ségolène Royal a três dies de la segunda bulta de las eileiçones presidenciales. Yá muito tiempo que nun oubie ua çcusson tan séria i cun las cousas tan claras. Dá gusto. Ye cumo se la política  i subretodo ls políticos, houbíssen, cumo na Grécia Antiga, ganhado de nuobo l respeito qu’eilhes mesmos ajudórun a zbarrulhar. Serie buono que ls 85% de ls franceses que fúrun a botar na purmeira bulta nun quedássen zanganhados cun aquilho que se bai passar a seguir.

Antre ls muitos assuntos çcutidos retengo l problema de las regiones francesas. Un de ls candidatos (nun amporta qual) propon que se baia mais longe nos poderes de las regiones, ua beç que ye la sola maneira d’ir mais longe na berdadeira democracie.

An Pertual çcute-se hoije ua nuoba Lei subre l tabaco. Eiqui bai para uns anhos era fino fumar i ls fumadores sentien-se mais amportantes cun l cigarro na boca. Hoije isso mudou. L cigarro ancomoda. Quien fuma ye mirado de lhado, porque se stá a fazer mal a el i a quien stá por acerca.

Cun alguns lhugares i ampregos ( ??????????  ) tamien habie de ser assi.  Quien acupa un lhugar que nun tenga ganhado ou sido scolhido democraticamente – ou seia, por concurso ou eileiçones – habie de tener la mesma bargonha de quien fuma i ancomoda quien stá por acerca.

Quando teneremos la coraige d’ampeçar esse camino de la democracie, ampedindo que quien manda i goberna (falo, ye cierto, de lhugares antermédios de poder) seia scolhido ou nomeado, segundo ten mais padrinos ou amigos? Cumo ansinar als nuossos alunos la democracie? De que maneira ban eilhes antender  l’amportância de ls studos quando l que bein todos ls dies son pessonas qu’acúpan lhugares an nome de ls partidos?

L’hardança salazarenta ye pesada, you sei, i muito camino falta andar para que la nuossa democracie alcance seia digna desse nome.



Scrito por António Bárbolo Alves às 00:02
Link de l post | Comentar | Ber comentairos (1) | Acrecentar als faboritos
|

Quarta-feira, 2 de Maio de 2007
La mie Pátria...

La lhéngua ye la mie Pátria
I you nun tengo Pátria: tengo mátria
You quiero frátria.

Caetano Veloso

 

Hubo un tiempo an que la Tierra de Miranda era un spácio çconhecido pa la maiorie de ls pertueses. Longe de Lisboua, sien stradas ou outros meios d’acá chegar, ls mirandeses fazírun-se pertueses por obra i grácia de ls acausos de la Stória i daqueilhes que fúrun defenindo las frunteiras. De cierto que se sentírun mirandeses antes de se sentir pertueses. Mas esta cundiçon tamien nunca la negórun, subretodo quando, por efeito de las guerras i outras lhuitas, fúrun chamados a defender la Pátria. Muita sangre fui dada i arramada an sou nome que, para muitos, fui mais madrasta qu’outra cousa.

Mas quei ye la Pátria? La berdadeira ye la tierra de ls nuossos pais, cun quien tenemos lhaços stóricos, afetibos i, modernamente, tamien jurídicos. La Pátria de ls mirandeses stá eiqui. Para alhá de todos ls jacobinismos i de todos ls jacobinos que solo beien la capital i l restro a partir de la capital. Se queremos un paiç donde todos mos síntamos filhos de la mesma mai, hai que pensar an repartir l mal i l bien d’eigual maneira. I isso quier dezir tener an cunta la giente, mas tamien la tierra, pois sien eilha nun hai giente.

Ls nuosso pais, ls nuosso abós, deixórun-mos esta tierra d’hardança i ye nuossa oubrigaçon tratar deilha, para que nun se torne nun çcampado onde nada medre. Para que seia un spácio houmanizado, natural, mas cun giente, capaç de fazer arregalar ls uolhos a quien chega i dá de frente cun la subérbia natural de las arribas ou cun la serenidade firme i anfenita de l praino.

Para isso, ye preciso que la Pátria seia tamien Frátria. Que nun tenga filhos i antenados, mas solo filhos. Que deia als qu’eiqui bíben ls meios d’acá cuntináren a bibir. D’eiqui criáren ls sous filhos. D’eiqui ancuntrar amprego. Cundiçones de bida. Ou anton iremos todos pa la borda de l mar i quando acá benirmos talbeç ancuntremos peinhas, árboles, bichos, mas nun ancuntrará cerrados, nien binhas, nien huortas, nien trigos, nien centenos, nien giente, mas ua tierra de naide, donde las ninas de ls uolhos yá nun se zlhúmbraran a nun ser cun las lhágrimas de nun habermos sido capazes de guardar l’hardança que mos deixórun.

 



Scrito por António Bárbolo Alves às 00:22
Link de l post | Comentar | Acrecentar als faboritos
|

Terça-feira, 1 de Maio de 2007
Maio

An Maio inda queimou la bielha l talho, diç l'adaige.

I ye berdade. Eiqui por riba, l d'astanho ben cun cara frie, auga i nubrinas. Ala, a calcer por drentro i a sacar las manticas que yá íban arrumadas nas arcas.



Scrito por António Bárbolo Alves às 00:37
Link de l post | Comentar | Acrecentar als faboritos
|


Saber neste blog
 
Dezembro 2007
Dom
Seg
Ter
Qua
Qui
Sex
Sab

1

2
3
4
5
6
7
8

9
10
11
13
14
15

17
18
19
20
21
22

23
24
25
26
27
28
29

30
31


Últimos posts

Outro blogue

L sabor de las palabras

L cura i la criada

L nino Jasus de la Cartol...

L problema de las lhéngua...

L sermon (ua cunta)

Alguas nomeadas

Quadras populares

Folhetos

L populismo i l pobo

Arquibos

Dezembro 2007

Novembro 2007

Outubro 2007

Setembro 2007

Agosto 2007

Julho 2007

Junho 2007

Maio 2007

Abril 2007

Março 2007

Fevereiro 2007

Fazer olhinhos
blogs SAPO
subscrever feeds